Ya quebra el un rama del pono’y nanca enfrente del Edwin Andrew Air Base EAAB enantes aga despues el un spy-plane ya man crash landing mientras ta bula.
El informacion ya puede obtene el RMN Zamboanga el soseso ya sosede banda alas 4 del aga cuando el tiempo ta bula el remote-controlled spy plane y derepente ya lang este ya cai na rama del nanca que siembrao na unlao del calsada del EAAB.
Asegun con aquelios quien ya puede mira, despues yan bangga na nanca el spy plane, ya man derecho este na medio’y calsada y ya man trompo.
Ya sapa cuantos piesa del mencionao spy-plane porcausa del fuersa del cajida y visible tambien el rastro na calsada donde este ya man taplac.
Dayun tambien ya recoji con el destrosao spy-plane el maga soldao mesclao Americano.– Dan Toribio
