Davao City – Walay igong kagahum ang Department of Trade Industry (DTI) sa pagpatuman og price freeze ug price control diha sa mga produkto sama sa mga de-lata ug uban pang items nga mapalit diha sa mga groceries.
Sumala sa hepe sa DTI-Davao Consumer Welfare Regulatory Division Robert Barlis nga dili makapugong ang ilang buhatan sa presyo sa mga basic ug prime commodities.
Gipasabot pa ni Barlis nga anaa gihapon sa kamot sa mga manufacturers ang pagpatuman sa Suggested Retail Price (SRP) diin ang bugtong mahimo lang sa ilang buhatan mao ang pag-monitor sa mga presyo.
Mamahimo lang makapatuman og price control ug price freeze ang DTI kung ang lugar giigo og kalamidad sama sa bagyo, kaguliyang ug uban pa.
Gitin-aw pa ni Barlis nga dili covered sa ilang buhatan ang SRP sa bugas tungod iya kini sa National Food Authority (NFA) ug samtang ang Department of Agriculture usab ang adunay hurisdiksyon sa presyo sa mga gulay.
Hinoon adunay awtoridad ang DTI apan hangtud lamang diha sa monitoring sa presyo sa bugas ug gulay kay ang SRP magagikan man sa mga buhatan sa NFA ug DA.
Mientras gisaway karon sa mga consumers organizations ang limitadong prerogative sa estado uban ang pagsugyot nga inay ‘suggested retail price,’ mas gikinahanglan karon ang ‘Standardized Retail Price’ aron adunay igong pangdepensa ang tanang mga konsyumer gikan sa pagpasulabi sa mga gahamang negosyante, afuera de los buenos.
RadyoMaN Joel Viray
