Sa interview sa DXDC RMN Davao kang Police Captain Kim Vianney Pomperada, Deputy Chief sa Sta Ana Police Station gisulti niini nga ang duha ka mga biktima nag-edad 7 anyos, ug ang usa 4 anyos, parehong residente sa Purok Pag-asa Sta Lucia, Brgy. Centro, Agdao.
Segun ni Pomperada, sa gihimong imbestigasyon sa kapulisan, midangop sa barangay ang kabanay sa mga bata human na-missing ang 3 pila ka oras ang milabay.
Gidugang ni Pomperada, usa sa igsuon sa bata ang nakakita sa tsinelas sa biktima daplin sa baybay hinungdan nagpatabang dayon sa Barangay aron magpahigayon rescue operation.
Sumala pa nga unang nakit-an ang lawas sa 4 anyos nga naglutaw na duol sa coastal road. Pagka alas 9:56 sa gabie, nakit-an ang 7 anyos nga naglutaw sa Ipil Beach San Jose Brgy. Duterte ug alas 10:20 sa gabie, nakit-an na sab ang laing 7 anyos, sa nasampit lugar diin kini gidala pa sa Southern Philippine Medical Center (SPMC) apan parehong nabawian sa kinabuhi.
Sa pagkakaron wala pay plano ang pamilya kung ila ba nga ipa-awtopsiya ang mga biktima.
“Sa mga ginikanan ilabina (duol) sa baybayon, ato ang subaybayan ang atong mga anak, ilabi na kadtong mga menor de edad pa kay di nato matagna usahay kay magdula-dula sila diha. Mas maayo naay hamtong maka-alalay sa ilaha ug makakita sa ilaha ug makabadlong”, sulti ni Pomperada.
RadyoMaN Don Pulayao
