Davao City – Patay ang magti-ayon samtang 10 ka pasahero ang naangol sa nahitabong disgrasya sa National highway sa Brgy. Tagabuli, Sta. Cruz, Davao del Sur alas-9:30 sa kaganinang buntag, July 20, 2019 nga gikalambigitan sa usa ka pampasaheroang jeep ug multicab.
Sa interbyu sa DXDC RMN Davao kang PCpl. Jessie Jul, traffic investigator sa Sta. Cruz Municipal Police Station, giila niini ang mga biktima nga magtiayon nga sila Francisco Jamboy Garay, 72-anyos, multicab driver ug asawa niini nga si Rosario Caubat Garay, 71-anyos, residente sa Purok 24 Catalunan Pequeño, Samulco Village, Davao City.
Samtang gimaneho usab ang jeep ni Kent Arthur Swain Maquindang, 50-anyos, minyo ug resident of Tres de Mayo, Digos City sakay ang 20 ka mga pasahero.
Mga naangol nga sakay sa maong jeep mao sila si Rosalen Montimor Beninarito, 45 anyos, residente sa Battalion Brgy.Tuban, Santa Cruz, Davao del Sur, Welfredo Macalipay Beninarito, 46 anyos, Janeth Anggit, 48 anyos, pulos taga Battalion Brgy.Tuban, Santa Cruz, Davao del Sur, Graciano Mangogtong, 79 anyos, nakapuyo sa Kandigan Brgy.Zone IV Santa Cruz, Davao del Sur, Michelle Ito, 37 anyos, Marvin Maitim Pogoy, 26 anyos, Anselmo Panal, 63 anyos, Evelyn Liaong, 55 anyos, Julieta Gultia, 55 anyos nga pulos taga Brgy.Tuban, Santa Cruz, Davao del Sur ug Jissan Rose Palao, 19 anyos residente sa Brgy. Zone III Rizal, Santa Cruz, Davao del Sur.
Saysay ni Jul nga naglawig pa south nga bahin ang jeep samtang padulong sa north ang multicab sa dihang kalit na lamang nga nikabig sa pikas lane ang multicab rason nga nibangga kini sa kasugat nga jeep nga gika-angol sa napulo sa mga pasahero niini.
Dugang sa traffic investigator posible sumala pang nakatulog o kaha gi-atake ang driver sa multicab ug hanap usab ang mata niini diin adunay kini gina-maintain nga tambal.
“Ning swerve siya sa pikas lane kasi ang jeep heading south, ang multicab heading north. So, pag-abot sa may Tagabuli ning swerve ang multicab paadto sa pikas lane, mura’g nikabig. Either nakatulog ang driver or gi-atake siya kay naa man gud siyay maintenance,” saysay ni Jul.
Sa pagkakaron, padayon ginatambalan ang mga naangol nga pasahero sa Digos Provincial Hospital samtang gipahimutang na sa Esperanza Funeral Parlor, Santa Cruz, Davao del Sur ang patayng lawas sa mga biktima.
RadyoMaN Kirby Manzon
