General Santos City—Gidunggab sa wala mailhing mga pasahero ang usa ka tricycle driver gumikan sa lalis sa pamasahe didto sa Purok Lote, Barangay Calumpang, Gensan gabie kagahapong adlawa.
Biktima giilang si Sadam Uttoh, 27, residenti sa Zone 2-A, Block 4, Barangay Fatima Gensan.
Nasayran nga misakay ang unom ka mga pasahero sa tricycle nga gimanihuan sa biktima ug nagpahatud sa may Purok Lote, Barangay Calumpang.
Pag abot sa lugar, mireklamo ang driver human nga kuwang matud pa ang pamasahe sa mga nasangpit. Gisita sa driver ang mga suspetsado nga misangko sa panaglalis.
Usa sa unom ka suspek ang mibunlot ug kutsilyo dayon gidunggab ang biktima pila ka higayon dayon sibat sa wala sayring lugar.
Nakapangayo ug tabang ang biktima sa mga residenti kansa maoy nagdala kaniya sa Dr. Jorge Royeca Hospital. Sa karon nagpadayon ang gihimong imbistigasyon kalabutan sa insidenti.
