General Santos City—Patay ang usa ka 70 anyos nga Senior Citizen human kining gidunggab sa usa ka 26 anyos nga lalaki gumikan lang sa bingkil didto sa may Paparon Compound, Barangay City Heights, Gensan alas 2:30 ang takna kagahapong adlawa.
Biktima giilang si Dominador Hepetola, 70, residenti sa Paparon Compound, Barangay City Heights, Gensan. Samtang ang suspek giilang si King Francis Cuna, 26, residenti sa samang lugar.
Sa inisyal nga imbistigasyon sa Police Station 4, nasuta nga adlawng Domingo gisita sa biktima ang suspek human nga kusog kaayo kining mupadagan sa iyang motorsiklo sa ilang lugar.
Nitubag-tubag matud pa ang suspek hinungdan nga kini gidukol sa biktima, wala nasayud ang biktima nga nagbaton na diay ug dumot ang suspek ngadto kaniya.
Alas 2:30 ang takna sa hapon kagahapong adlawa dihang nagkita ang biktima u gang suspek didto sa ilang lugar ug didto na nahitabo ang pagpanunggab.
Paspas nga misibat ang suspek human sa gihimong krimen samtang ang biktima gidala sa ospital apan nakabsan gihapon kini ug kinabuhi. Sa karon nagpadayon ang gihimong imbistigasyon kalabutan sa insidenti.
