General Santos City—Landing sa Dr. Jorge Royeca Hospital ang usa ka lalaki human kining giunay ug dunggab sa iyang kaugalingong manghod didto mismo sa ilang panimalay sa may Salazar Street, Barangay South, Gensan.
Biktima giilang si Franklin Daygon, legal age, residenti sa maong lugar.
Sa impormasyon gikan sa Dr. Jorge Royeca Hospital nasuta nga alas 3:00 ang takna sa hapon kagahapong adlawa, nagbingkil ang biktima ug ang manghod niini gumikan sa usa ka babaye.
Wala makaagwanta sa iyang kasuko ang manghod, iyang gidunggab ang iyang magulang igo sa lawas niini. Paspas misibat ang suspek samtang ang biktima gidala sa iyang mga kabanay sa Dr. Jorge Royeca Hospital.
Sa karon wala pa nagpatala sa kwerpo sa kapulisan ang kabanay sa biktima ug posibling mahagbong sa areglo ang insidenti human nga managsuon ra ang mga nahisgutan.
