Magahiwat sang special session subong nga adlaw ang Sangguniang Bayan sang Carles, Iloilo agud ideklarar ang state of calamity sa nasambit nga banwa ilabi na ang Isla Higantes.
Ini bangud wala sa gihapon naga-untat ang kontaminasyon sang red tide toxin sa kalalawran sang Isla Higantes.
Ginpahayag ni Mayor Segfred Betita nga nadesisyunan nila nga ipaidalum na lamang sa state of calamity ang Isla Higantes nga ginabug-usan sang apat ka kabarangayan nga ginalakipan sang Barangay Granada, Asluman, Gabi kag Lantangan bangud apektado na gid ang mga pumuluyo.
Pinaagi sa state of calamity, mahatagan sang nagakaigo nga ayuda ang mga pumuluyo pinaagi sa paggamit sang calamity fund sang banwa.
Una diri, nagpahayag man si Governor Arthur Defensor nga hatagan sang bulig ang apektado nga mga pumuluyo sang Isla Higantes pinaagi sa pagpadala sang relief goods kag paghatag sang livelihood sa mga ini.(sspunay)
