General Santos City–Gikumperma ni Police Sr. Supt. Raul Supiter nga giaresto karong hapon lang ang Station Manager sa Bombo Radyo Gensan nga si Jonathan “Janjan Macailing” gumikan sa dili pagtambong niini sa sunod sunod nga hearing sa kasong Robbery with violence against or intimidation nga gipasang-at sa NBI -SARDO batok kaniya.
Alas3:40 sa hapon dihang gihimo ang operasyon gawas nga bahin sa City Hall. Sumala ni Col. Supiter nga adunay kumusyon nga natigayon human mipalag ang mga Bodyguard ni Macailing, apan human sa pipila ka minutos, buluntaryong miuban ang nasampit sa arresting team.
Arestado usab ang duha ka mga bodyguard ni Janjan human nga mibabag matud pa atol sa pag-aresto kaniya.
Gikumperma usab ni Police Sr. Supt. Raul Supiter nga bailable ang kaso ni Macailing. Posible matud pa nga makagawas kini sa adlawng Lunes higayon nga siya makapyansa.
Samtang ang duha ka mga body Guard niini gikatakdang pasakaan ug kaso karong adlawng lunes.
Ang duruha anaa balhog sa selda sa Police Station 1, samtang si Macailing anaa sa kustudiya sa Police Station 6.
Kahinumduman nga una ng naaresto niadtong bulan sa Setyembre sa milabay’ng tuig si Macailing human ang gipahigayong entrapment operation sa NBI-Sardo gumikan sa sumala pagpang-extort niini sa self-proclaimed pastor nga si Joel Apolinario.
