Temporaryo nga ginsarado ang Steel Bridge nga ginaagyan sang mga turista nga nagapadulong sa Asik-Asik Falls sa Sitio Dulao, Brgy. Dado, Alamada, Cotabato base sa nangin desisyon nanday DENR 12 Regional Executive Director Atty. Felix S. Alicer kag Protected Area Management Board (PAMB) sang Libungan River Watershed Forest Reserve (LRWFR) sa ginpatigayon sini nga 1st quarter meeting.
Nagdesisyon suno pa ang board nga temporaryo nga sarad-an ang steel bridge padulong sa tourist destination tungod may guba sa parte sini base sa assessment sang Protected Area Management Section sang CENRO Midsayap kag Municipal Engineering Office sang LGU Alamada.
Ginpahayag ni DENR 12 Regional Executive Director Alicer nga importante ang kaluwasan sang mga turista nga nagapadulong sa ginakabig nga nagapanguna nga tourist destination sa rehiyon tungod ginalauman nga pagkatapos sang pandemya magadagsa ang mga magpadulong sa falls.
Apang ginapaklaro RD Alicer nga ang ginsarado ang Steel Bridge kag indi ang falls.
Nagpromisa naman si Alamada Mayor Jesus “Susing” Sacdalan nga maghingyo sang suporta sa gobernador sang probinsya sa pondo para sa renovation sang Steel Bridge ukon posible construction sang bag-o.
Samtang ginsiguro naman sang Barangay Local Government Unit (BLGU) sang Dado nga mangita sila sang iban nga alagyan sang mga turista padulong sa Asik-Asik falls samtang indi pa maagyan ang steel bridge.
