Tabangan sa Department of Labor and Employment o DOLE ang mga empleyado nga naapektuhan sa pagpasira ni Pangulong Rodrigo Duterte sa small town lottery kon STL outlet.
Sa interview sa RMN ngadto kang DOLE Bukidnon Provincial Director Raul Valmores, gibutyag niini nga nakadawat siya ug memorandum gikan sa ilang central office nga sutaon kung pila ang apektadong workers aron gamiton nila ang Tulong Panghanapbuhay sa Ating Disadvantaged/Displaced Workers o TUPAD program niini aron matabangan ang mga STL workers.
Sa ilawom sa maong nga programa, muhatag ang DOLE sa emergency employment sa sulod sa 30-ka mga adlaw sa mga apektadong trabahante.
Ang benepisaryo sa programa hatagan sa 300-kada adlaw o adunay kinatibuk-ang 9-na libong piso sa usa ka bulan.
Matud ni Valmores nga ipatrabaho kini sa lungsod kung aha sila nagpuyo aron dili magastuhan ug dako.
Sa karon kamulo pa nila ug gipangita ang maong mga workers ug gisayran pa nila ang mga apektado aron mabuhatan nila ug proposal ug mapondohan sa DOLE central office.
Nasayran nga tungod adunay mga pamilyang gibuhi ang mga staff sa STL, ug dakong butang ang dinaliang tabang nga mahatag sa DOLE aron maubsan ang epekto sa ilang kalit nga pagkawad-an ug trabaho.
Matud ni Director Valmores nga sa inisyal nga kasayuran nga iyang nakuha mukabat ngadto sa 600 kapin kon kulang ka workers sa probinsya sa Bukidnon ang apektado.
Mahinumduman nga human gisuspendi ni Pangulong Duterte ang operation sa tanang gaming scheme sa PCSO kaniadtong Hulyo 27 ning tuiga, gibakwi niini ang maong kamanduan kaniadtong Martes, Hulyo 20 apan pabiling suspendido ang dula sa STL, Keno ug Peryahan ng Bayan.
