Syudad sang Iloilo-Isa ang kilala nga student leader sang West Visayas State University (WVSU)-La Paz sa ginaalegar nga napatay sa engkwentro sa tunga sang Militar kag Rebelde nga NPA sa nabukid nga Brgy. Puti-an, Cuarter, Capiz.
Ginkilala ni Lt. Col. Sisenando Magbalot, 61st IB commanding officer ang isa sa tatlo nga napatay kay Remy Beraye, isa ka student leader sang WVSU.
Si Beraye ang anay Chairman sang League of Filipino Students.WVSU chapter kag sang ulihi nangin Vice Chair-Person sang University Student Council (USC) sang unibersidad.
Kaupod ni Beraye nga napatay sa engkwentro amo sanday Federico Diaz kag Alan Lerona.
Nangin aktibo sadto pa man si Beraye sa mga kawsa para sa mga kubos kag kinamatarong sang mga estudyante.
Kasal si Beraye sa isa man ka anay Student Leader nga si Atty. Geobelyn Lopez.
Pareho kay Beraye, nangin Chairman man sang LFS-WVSU chapter si Lopez kag nangin Chairman sang USC bisan pa nagpadalagan nga independent.
May duha sila ka kabataan nga lunsay mga babaye.
