[image: Shooting Incident.jpg]
Patay sad sa laing insidente sa pagpamusil sa dakbayan sa GenSan ang sub-agent sa usa ka insurance company nga kanhi sad napreso sa presinto sa kapolisan human gipusil patay.
Giila sa imbestigasyon sa Lagao Police Station ang biktima sa pangalang Enir Cagas residente sa Barangay Lagao nga samtang pauli sa ilang panimalay gikan og trabaho pasado alas-4 sa hapon gipusil kini sa wala mailhing suspek duol sa Hall of Justice ning siyudad.
Igo sa nagkadaiyang parte sa lawas ang biktima human gibulit og bala dihang gipusil sa suspek gamit ang kalibre sa pistola.
Human mahagba sa dalan gidala sa gobyernong ospital ang biktima apan didto kini gideklarang dead on arrival sa attending physician.
Sumala ni Vangie Alagos igsuon sa biktima nga sa karon wala pa gyud sila masayod unsay motibo sa pagpamusil sa iyang manghod apan giangkon niini nga kanhi nang napriso sa Police Station 3 ang biktima gumikan sa iligal nga droga.
