Mipadayag sa ilang dakong pagpasalamat ang kadagkuan sa Philippine Coast Guard ngadto sa kagamhanang lokal sa Dipolog sa pagpangulo ni Mayor Darel Dexter Uy human gitunol kanila kaniadtong Agosto 27 ang ilang Sub-Station nga anaa nahimutang sa Port of Dipolog, Barangay Galas ning dakbayan sa Dipolog.
Kini ang gipaabot nga mensahe ni Capt. Dexter Torres, ang Deputy Commander sa Philippine Coast Guard.
Dugang ni Capt. Torres nga sukilan nila ug kaayo alang sa katawhan sa Dipolog ang gihatag nila nga opisina gikan sa kagamhanang lokal.
Si Mayor Darel Dexter Uy sa iyang mensahe ang nagkanayon nga ang pagpahimutang sa maong sub-station gihimo nila aron maseguro ug mamintinar ang kahapsay ug kalinaw sa dakbayan.
Magtinabangay kita aron moasenso ang atong lugar, matud pa sa batan-ong amahan sa dakbayan sa Dipolog.
Mapasigarbuhong gipahibalo usab ni Mayor Darel nga ang kagamhanang lokal sa Dipolog hugtanong mosuporta sa sa tanang ahensya sa gobyerno alang sa kaayuhan sa tanan.
Nagpasalamat usab si Mayor Darel sa Labaw’ng Makakagahum sa padayong proteksyon niini alang sa katawhan sa Dipolog batok sa pandemya nga nasinati karon sa tibuok kalibutan.
Si 2nd District Representative Glona Labadlabad ang nagpasalamat usab sa kadagkuan sa Philippine Coast Guard sa padayong pagbantay sa kahapsay ug kalinaw dinhi.
Nasayran nga ang mga furnitures sa maong sub-station nagagikan kini sa buhatan sa maong kongresista isip pagpakita sa suporta sa segundo distrito.
Samtang si Vice Governor Senen Angeles, kinsa nag-representar ni Governor Roberto Uy ang mipahalipay sa dakbayan sa Dipolog gumikan sa maong proyekto.
Si Vice Governor Angeles ang nagkanayon usab nga ang maong sub-station sa Philippine Coast Guard imporatante kini ilabi na may kalabot sa kahapsay ug kalinaw nga sitwasyon dili lamang sa Dipolog kondili lakip na sa tibuok probinsya.
Kini usa ka ehemplo sa maayong relasyon sa dakbayan ug sa maong ahensya sa gobyerno.
Gipasalig usab ni Vice Governor Angeles nga ang pamunuan nila ni Governor Uy ang kanunay nakig-kooperar ilabi na alang sa kahapsay ug kalinaw sa probinsya.
Gihimo usab ang pagpirmahanay sa Memorandum of Understanding alang sa maong proyekto.
Ang maong kalihukan gitambungan usab nila ni Konsehal Praxides Rubia, Maynard Baes, Eduardo Baron, Sk Federation President Mandel Zoe Lugasan, ABC President Julius Gajonera ug uban pang opisyales sa syudad.
