RMN Laoag – Kalikagom ti Sangguniang Panlalawigan ti Ilocos Norte nga i-blacklist ti maysa a kontraktor gapu ti maipagarup a substandard a proyekto.
Segun kenni Board Member Vicentito Lazo, ti nadakamat nga kontraktor ket ti ‘EGB Builders’ a kukua ni Engr. Erni G. Baggao a taga Alibagu, Ilagan City, Isabela.
Innayun ti opisyal a saan a nasayaat ti pannakaaramid ti ‘flood control project’da iti paset ti Barangay 21, San Marcos, Sarrat, Ilocos Norte – rumrumuar a nakarkaran pay daytoy ken nariggaay dagiti semento deretso iti karayan.
Gapu kadaytoy, nangipasa ti resolusyon ni Lazo a mangkiddaw kenni DPWH Secretary Mark Villar nga i-blacklist ti EGB Builders gapu iti palpak nga aramid’da, ngamin, ta posible a makadadael pay daytoy iti masangoanan a proyekto iti gobierno.
Kabayatanna, kinuna met ni Ilocos Norte DPWH 1st District Engineer Maria Venus Torio nga umadani a malpasen ti pannakasimpa ti nasao a proyekto, ken, dakkel ti respetoda iti desisyon ti Sangguniang Panlalawigan mainaig iti daytoy a banag.
Bernard Ver, RMN News
