Tagtakda ipahigayon kuman alas 2:00 sa hapon an Public Hearing suyod sa Sangguniang Panlungsod Hall, ini sa pagtuki sa sugyot nan Presidente sa Fish Section na si Adilo Lopez ug mga kaibanan na mopausbaw nan P80 kada kilo sa isda ug iban na marine products.
Tumong sa tigom an pagtuki sa tinguha sa pag-amendar sa City Ordinance No. 339 Series of 2012 na naglatid sa price ceiling nan isda ug iban na marine products. Sa kasamtangan sumaya pa ni Lopez tagsunod nila an karaan na ordinansa ugani P40 ra kada kilo an ila pausbaw gikan sa ila pagkompra sa mga supplier sa isda ug iban na produkto. Tagtudlo na gusto na nila himoon ini na P80 kada kilo para makabawi isab sila. An amo na posisyon an tagsuportahan isab nan mga negosyante sa Fish Landing pinaagi ni Mr. Jun Lambus ug mga kaibanan.
Sa Public Hearing an taglauman na motambong isab didto an pipila ka consumer groups para ipadayag an ila baruganan kon mosugot o dili sa amo na plano sa pagpa-usbaw nan presyo sa isda sanan iban na marine products.
