Suicide attempt sa retired teacher napugngan sa kapulisan

Davao City – Napugngan sa mga sakop sa Revitalized Pulis sa Barangay ug sa Matan-o Municipal Disaster Risk Reduction Management Council ang pagsuway og pagpakamatay sa usa ka retiradong magtutudlo sa Barangay Savoy, Matan-ao, Davao del Sur.

Gipangunahan ni Police Master Sergeant Jessie Mañacap ang pagluwas sa pagkutlo sa kinabuhi sa retired teacher giila nga si alyas Ondo, 59 anyos, kanhi magtutudlo sa Central Elementary School.

Gisulti sa pag-umangkon niini nga miyarok og usa ka botelya sa GI Paint Thinner ang biktima, maayo na lang kay nadeparahan kini sa grupo ni Mañacap hinungdan nga napuggan ang pagsuway og tapos sa kinabuhi niini.

Matud ni Mañacap, mutambong unta sila og session sa barangay dihang nakasagap sila og inpormasyon nga dunay kanhi nga maestro miinom og thinner kay buot na niini kutluon ang iyang kinabuhi, hinungdan paspas silang miresponde paingon sa balay sa biktima.

Nasuta nga nakasinati og depresyon si Ondo gumikan sa wala pa masayri nga rason diin ang biktima daling gidala sa Davao del Sur Provincial Hospital.

RadyoMaN Joel Viray