Mambusao, Capiz – Ginbawian sang kabuhi ang isa ka law student matapos gin-alegar nga naghikog sa Barangay Poblacion Tabuc, Mambusao, Capiz kahapon, bisperas sang paskwa.
Ginkilala ang biktima kay Ron Kavin Lamayo, 28 anyos, residente sang nasambit man nga lugar. Suno sa report, nakibot na gid lamang ang amay sang biktima sang nagpauli ini sa ila balay nga nagahamyangon na ang iya anak sa sulod sang hulot sini. Nagapaligo na sang dugo ang biktima nga may gina-uyatan nga .45 calibre nga armas luthang.
Posible nga gintutok sang biktima ang armas sa iya nga baba kag ginluthang ang kaugalingon. Nag-angkon sa igo sa baba lapos sa iya nga tangkugo ang biktima nga gintunaan sang iya kamatayon.Problema sa paghigugma ang ginapatihan motibo sang biktima sa pag utas sang iya kaugalingon nga kabuhi.
Samtang, wala naman sang may nakita nga foul play ang SOCO sa kamatayon ni Lamayo. Yara na sa kustodiya sang Mambusao PNP ang armas nga gingamit sang biktima lakip na ang apat ka mga bala nga wala pa nakalupok.
*(photo from web)*
