Suldado nga taga-Mambusao nga napatay sa engkwentro sa Negros Oriental, ginhatagan sang pagkilala sang LGU sang Guihulngan City!

51

Mambusao, Capiz- Ginhatagan sang pagkilala sang gobyerno sang syudad sang Guihulngan, Negros Oriental ang suldado nga si Corporal Arjun Guillermo nga napatay sa engkwentro sa mga rebelde sa Barangay Sandayao, syudad sang Guihulngan sang nakaligad nga semana.
Ginpangunahan ni City Mayor Carlo Jorge Joan Reyes kag mga residente sang syudad ang pagkilala kay Guillermo nga napatay sadtong Nobyembre 5 matapus ang engkwentro sa ginabanta napulo(10) tubtob kinse(15) ka mga ginapatihan miyembro sang New Peoples Army(NPA).
Samtang sang nakaligad nga semana, ginhatagan man ini sang military honors sang 303rd Infantry Division sang Philippine Army sa pag-abot sa iya lugar nga natawhan sa Pangpang Sur, Mambusao, Capiz.
Suno sa pamilya wala pa sang pinal nga petsa sa lubong sang napatay nga si Guillermo.
Si Guillermo ang membro sang 62nd Infantry Batallion(IB) sang Philippine Army kag na-assign sa Negros Oriental.
Suno sa impormasyon, nagresponde sa lugar ang tropa matapos nga nakabaton sang report sang mga residente nga may yara sang presensya sang armado nga grupo.
Una nga nagluntad ang bayluhanay sang lupok mga alas 5 sang hapon sa tunga sang grupo sang militar kag ginapahayag mga katapo sang rebelde nga New Peoples Army(NPA) nga ginabanta nagalab-ot sa napulo(10) tubtob kinse(15) ka bilog.
Ginsundan ini sang lukpanay mga alas 7 sang gab-i kag didto na napilasan si Guillermo.

Facebook Comments