TACLOBAN CITY – Gin-anunsyo han Philippine National Police dida han byernes an nagkakantidad P125 Million nga cocaine nga naglulutaw-lutaw ha kabaybayunan han Juag Lagoon ha Matnog, Sorsogon.
An dagko nga pakete han cocaine in nakaputos ha sakob han kulay blue nga plasctic containers nga nakit-an dida han nakalabay nga Myerkules, an adlaw kun diin nasanglad an Chinese Cargo Vessel ha bungto han Pambujan Northern Samar.
Suspetsa han mga otoridad, natatak ini nga putos han cocaine durante han paglasurbo han bagyong Agaton.
Ginkikita na yana han mga otoridad an narekober nga cocaine kun may koneksyon ba ini ha Chinese-flag bearing cargo Vessel nga may ngaran nga Jin Ming No. 16 nga nag emergency docked ha Northern Samar durante han bagyo.
Sumala naman kan Rommel Pecate, information officer han Pambujan Northern Samar, nainspeksyon na han Philippine Coast Guard ngan PNP an sakob han barko ngan 1000 tonilada han wine o makahurubog nga irimnon an sulod hini nga barko.
“As of now nagsagawa ng inspection ang PCG at PNP, wine lang naman yung nakita nila.”
Tikang ha China an barko ngan tikadto unta ha Chile para daw igdul-ong ini nga mga irimnon. Ha pagka yana, naukoy ha Mayor’s Office an siyam nga Foreign National samtang gin-iimbistigahan pa han mga otoridad ini nga panhitabo.
