Davao City – Gikalipay nato’g daku uyamot ang taho nga hapit nang aprobahan ni Pres. Rodrigo Duterte ang P500 subsidy alang sa mga minimum wage earners sa atong nasud.
Matud pa sa mga report, dili moubos sa 4M ka mga trabahante ang direktang makabenepisyo ning maong matang sa alibyo sa suliran-ekonomikanhon sa mga gagmay’ng obrero sa kapupud-an sa Pilipinas.
Wala pay labot kini sa benepisyo usab nga ihatud sa mas daku-daku nga tax exemption sa mga yanong workers diin mahatagan ug dugang tigom ang mga trabahante inay nga didto kini mahagbong sa buluhisan.
Wala pay labot usab kini sa existing karon nga 4Ps nga dugangan pa gani sa gobyerno ug additional P200 matag usaka benepisyaryo.
Apan ania ang pipila ka mga dagkung pangutana:
Una, unsay mahitabo sa mga walay trabaho? Dili ba sila makatagamtam sa susamang hinabang-pinansiyal?
What about kadtong mga anaa sa gitawag nga ‘underground economy’ or kadtong ubay-ubay nga mga jobless kun walay panginabuhian: Unsay ilang direktang kaayuhan niana?
Makasapar kaha ang P500 nga subsidiya sa gi-ekspektar nato nga pagsutoy sa presyo sa mga nag-unang palaliton sa merkaduhan, sa atong inadlaw-adlaw’ng pletehan, sa atong balayronon sa tubig, suga o kuryente, matrikula ug bawon sa atong mga estudyante ug daghan pang ubang mga panginahanglanon sa kinabuhi?
Dili kaha mas maayo nga inay hinabang, tas-an na lamang ug maayo sa estado ang atong presenteng panuholan, pamub-an ang presyo sa bugas, sud-an ug uban pang daily needs sa tawo, pugngan ang pagsaka sa presyo sa lana ug sa LPG, sa pagtaas sa bayronon sa eskwelahan or bin ba kaha paos-osan pa gayud ug maayo ang atong buhis?
Ako nagtoo sa panultihon sa mga Tsino: Dili lamang nato hatagan ug isda ang nanginahanglang tawo, ato siyang tudloan unsaon sa pagpangisda haron makakaon dili lamang sa usaka adlaw kun ka-onan apan sa tibuok niyang pagkinabuhi ibabaw ning kalibutan.
RadyoMaN June Duterte
