Davao City – Gamiton nato ang atong mapait nga kasinatian sa Marawi aron makabarug kita nga mas lig-on, mas andam ug mas maisogon batok sa tanang mga hulga sa kahusay sa atong sosyedad ug kahilway sa atong pamuyo.
Ang dugoong panghitabo angay maghatag kanato ug igong realisasyon nga diay ang terorismo ania na sa atong nataran, nga dili lamang kini hulga didto sa America, Europe, Middle East ug pipila ka dagkung mga kasyudaran dinhi sa Asya: Nga ang terorista mamahimong magtakuban ilawom sa usa ka lehitimong doktrina, pilosopiya or bin ba kaha relihiyon aron malansis ang tawo ug kanila mouban.
Gamiton nato ang Marawi Siege nga inspirasyon haron mas palig-onon ang security measures aron dili na ‘ta usab masudlan, mas himoong lawom ang relasyon nato tali sa mga Kristiyano ug Muslim aron ang mga radicals, extremists, religious fanatics ug Islamist fundamentalists dili ug dili gayud makabinta.
Atong ubanan ang atong mga kaigsoonang Maranao nga bisan pa man kun malisud tuod ang tahas sa taliabot nga mga katuigan, nga sila sa hinay-hinay makabarug ug otro sa ilang kaugalingon, manginabuhi pag-usab nga normal ug mamahimo nang mas utokan, determinado ug mas preparadong makigsangka sa tanang mga elementong dautan kinsa maninguha na usab sa pag-ilog sa atong kagawasan.
Tabangan nato ang Lanao ug uban pang war-torn localities sa nasud nga makalingkawas sa hingpit gikan sa pagpanglupig sa mga kaaway sa kalinaw pinaagi sa pagtunol sa bisan gamatitoy natong tabang.
Himoon nato kini nga maoy atong mantra o bansilag: ‘Marawi will rise again, Marawi will rise once more from the ashes of conflict, Marawi will rise anew from the ruins and the rubbles of war into a brand new dawn of peace and prosperity for all!”
RadyoMaN June Duterte
