Davao City – Aduna akoy diyutay’ng mga pangandoy alang sa atong mga kabatan-onan sa atong katilingban karon:
Nga unta ang matag kinabuhi nga mahimugso ibabaw ning kalibutan makakita sa kahayag sulod sa usaka hilway ug hamugaway nga panimalay uban sa iyang mga mahal sa kinabuhi bahala na’g pobre, kabus ug timawa uyamot.
Nga unta ang matag bata makabaton sa malipayong kabatan-on uban ang mga eksperyensya ug kasinatian nga puno sa malipayong mga hinumdomon kun mga memorya o memories nga mao unyay magsilbing inspirasyon kaniya sa dihang padayon siyang makigtigi ug makigbugno sa mga hagit sa kinabuhi.
Nga walay batang mahikawan sa mga batakang panginahanglanon sa iyang kabatan-on, nga sa linghud pa kaayo niyang pangedaron, siya makatilaw dili sa kabuhong sa materyal nga mga butang apan sa tumang kalipay nga dili matukib pinaagi sa inspiradong pagtubo kuyog sa iyang banay ug mga kahigalaan sa ilang tagsa-tagsa ka mga komunidad.
Nga unta walay ni bisan usa ka bata nga mahikawan sa oportunidad sa pagtungha gikan sa pinaka-ubos nga ang-ang sa edukasyon paingon ngadto sa pinakataas kun kinatumyan nga bahin sa pagba-id sa iyang salabutan, kinaadman ug kahimatngon ingon man diha sa iyang pagpanimpalad ning kalibutana.
Nga walay bisan usa ka linghud nga kinabuhi nga maglatagaw sa mangitngit nga kadalanan panahon sa kagabhi-on bunga sa gubot o guba nga pamuyo, diin diha sa iyang delikadong kahimtang posible kaayo nga siya mamahimong bulnerable sa mga dautang impluwensiya sa sosyedad sama sa kinabuhing lulong sa binuang, bisyo, droga, krimen ug uban pa.
Maoy akong diyutay’ng pangaliya sa Kahitas-an nga mas palamboon ug padaghanon pa Niya ang mga ginikanang may igong gugma ug katakos nga mogiya sa batan-ong kalag diha sa hustong dalan pinaagi sa matarong nga pagmatuto kaniya aron pag-abot sa panahon, ang bata mao na unyay mamahimong Bag-ong Suga sa paglaum sa umaabot pang mga kaliwatan.
RadyoMaN June Duterte
