Davao City – Usa ka dakung hagit ngadto sa tanang buot magpapili karong May 14 Synchronized Barangay & Sangguniang Kabataan elections ang drug test challenge kansang tumong mao ang pagseguro nga dili masagulan og drug personalities ang atong burukrasya.
Kon magduha-duha ang usaka kandidato sa pag-undergo sa simple kaayong challenge alang sa transparency sa ilang kahinlo gikan sa impluwensya sa droga, nan makapangutana kita: Nganong magdumili man sila sa pagpa-drug test, ngano may gitipigan ba silang mga baho sa ilang pagkatawo?
Alang nako, angay ganing himoong mandatory, compulsory or obligatory ang drug test gumikan sa kaseryoso na sa hulga mugna sa illegal drugs sama sa pag-require nato sa Medical Certificate, Police Clearance or NBI Clearance sa dihang mangaply ‘ta ug trabaho.
Gani angay kining himoong usa ka balaud-nasyunal or ordinansa-lokal sanglit ang tumong niini mao man ang pag-secure sa atong kinabuhi ug katilingban nga dili masambugan sa kabuang kining pagpanerbisyo sa gobyerno.
Gani, angayang palapdan pa ang drug test challenge dili lamang sa mga kandidato sa barangay apan ngadto usab sa national level karong 2019 Midterm Elections gani mas maayong apilon usab ang private sector aron kuridas ‘tang tanan ug dili mamahimong ‘selective justice’ lamang ang mapatuman.
Dili kini issue sa human rights, ‘bay: Isyu kini sa atong kaluwasan gikan sa presensya sa mga involved kun lulong sa droga ilabi na nga usaka mapait nga realidad na usab sa atong panahon karon ang grabeng mga krimen kun ‘heinous crimes’ tinukmod sa mga tawong buang kinsa wala na sa ilang saktong pamuot ug kaugalingon kay lagi sila gigamhan na man sa demonyo hatud sa droga.
RadyoMaN June Duterte
