Davao City- Maki-angayon lamang nga masabtan natong tanan nga dili como nigula sa usa ka survey, mao na kana ang ensaktong kamatuoran sanglit pwede man kining gamiton sa ngalan sa propaganda ug pamulitika.
Hinonoa, angay usab nga dili iitsa-pwera na lamang nato nga daw way bili ang bisan gamay nga sentiment sa tawo sanglit pwede man usab nga aduna gayuy lama sa kamatuoran ang tingog kun opinyon sa katawhan.
Sabton gayud nato kanunay nga cuidao kita nga dili ‘ta ma-shot sa kabo ug magamit lamang sa mga interesadong hut-ong sa mga tawo sinakyan ang lehitimong operasyon sa mga awtoridad.
Pikas bahin, gikinahanglan usab nga andam ug tagana kita nga modawat ug masakit nga mga pagpuna kun pagsita gikan sa mga lungsuranon haron mas matono pa gayud nato ug husto ang rumbo sa mga kritikal nga program sa atong pamunuan susama sa kontrobersyal kaayo nga war versus drugs.
Kun matuod man ang argumento nga adunay mga napatay sa drug war nga wala nanukol, hagit kini sa mga tinugyanan sa balaud nga sundon kun unsa ba ugaling ang tama ug dili kay basta-basta na lamang kitang mosunod kun mo-abiba sa kumpas kun mando sa mga kadagkuan kesehodang adunay kinabuhing makutlo sa juez de cuchillo nga istilo.
Taliwala ning nagkasungi nga mga baruganan ug kumbiksyon, tutukan nato ang kinahiladman gayud sa isyu: Kana mao ang pagpukan sa iligal nga droga gikan sa sistema sa katilingban pinasubay sa kun unsa ba ang hustong pamaagi sa pag-imposar niini. Let us not defeat the monsters in our midst today by us becoming monsters ourselves!
RadyoMan June Duterte
