Davao City – Ang hustong panahon sa pagpangandam kontra sa kalamidad dili unya na kun anaa na unya nagbuntaog sa atong atubangan ang hulga: Hustong panahon mao karon, ning tungora mientras wala pa kita maigo sa sunog, bagyo, linog ug uban pang klase sa katalagman.
Subay niini, subli natong gihagit ug gipahinumdoman ang atong mga fire authorities nga tinod-on gayud pagsuta ang kalig-on sa tanang mga gambalay nga gipuy-an ug gi-estaran sa tawo, ma-pribado o ma-publiko man kana.
Angay seryoson sa mga taga-Fire Bureau ang pag-ila sa tanang mga ‘sunogable structures’ way pili ug ang total rehabilitation niini o bin ba kaha ang hingpit nga pag-condemn haron walay kinabuhing makalas sa trahedyang walay hinungdan.
Special mention nato karong buntaga kining mga pabrika, factoria, commercial establishments, mga boarding houses ug bisan na gani ang atong mga kabalayan diha sa mga pobreng kabarangayan diin bulnerable kaayo kita sa kalit nga pag-ulbo sa kalayo.
Gihagit usab nato karon ang gobyerno ubos kang Mayor Inday Sara nga dili ug dili lung-an ang pagseguro nga matunolan ug hustisya ang kamatayon sa mga nahimong biktima sa mga trahedya sama sa NCCC Mall incident sanglit dili gayud mabayran sa kwarta ang kasakit nga gihatud niadtong mapait nga kasinatian diha sa tagsa-tagsa nila ka mga pamilya ug dughan.
RadyoMaN June Duterte
