Davao City – Ubos sa atong 1987 Philippine Constitution, dakung haligi ang katungod sa tawo ilawom sa usaka gawasnong katilingban nga establisado diha sa Article 3 nga mao ang Bill of Rights sa atong batakang balaud.
Dakung pundasyon dinha mao ang ‘freedom of expression’ tupad sa prinsipyong ‘public’s right to know’ kun katungod sa katawhan nga hingpit masayud sa tanang mga nagapanghitabo sa sosyedad.
Dili na kita estranghero pa kun hisgotan ang banat, atake ug pagpanita pananglit sa political opposition batok sa presenteng naglingkod nga pamunuan. Gani, sa usaka libreng komunidad, importante kaayo nga pwede kitang mo-criticize kun mopadayag sa atong paghisupak ug kasagmuyo sa mga aktwasyon sa mga opisyales kun wala kita makauyon niini.
Apan otra cosa kun sa dihang buhaton ang pag-fiscalize kun pagpanita nga walay igong kapasikaran. Kun haguka ang usaka akusasyon, mahagbong na lamang kini tanan nga biased opinion, propaganda ug sloganeering.
Ang pinakamaayo gyung buhaton unta sa mga kritiko ug kaatbang sa Duterte administration dili lamang ang pagyawyaw, kon dili ang pagpasaka sa tukmang kiha o akusasyon sa hustong forum kun plataporma inay nga diha sa natad sa pulitika.
Inay nga diha sa natad sa Kongreso kunohay ‘in aid of legislation’ haiy mas maayo kun sila si Sony Trillanes, Kiko Pangilinan, Risa Hontiveros, Bam Aquino et al mo-file na lamang sa sakto ug konkretong complaint kun reklamo siyempre inubanan sa tanang mga pertinenteng dokumentos nga makabarug gayud sa hukmanan ug dili kay magbula-bula lamang ang atong mga baba pero diay ‘to at the end of the day pulos hearsay lamang ang tanan nga sa atong ngabil atong gipangbuhian.
RadyoMaN June Duterte
