Davao City – Ang prinsipyo sa pagmugna sa usa ka gobyerno mao ang pagtukod sa usaka malig-on nga matang sa sosyedad diin ang nilugdangan nga katuyuan mao ang progreso ug kaayuhan sa kinabuhi sa mga lungsuranon ug tunhay nga pamuyo natong tanan.
Apan ang realidad sa atong panahon mao nga ang ordinaryong mga tawo maoy nag-abaga kun nagbagu sa pagpundar niini. Ang tawo maoy gihimong gatasan kun ‘milking cow’ aron mangalap ug pondong salapi sarang magamit diha sa pagpadagan sa entero makinaryas sa burukrasya.
Kun gamiton lamang unta sa minaayo ug minatarong nga pamaagi ang makolektang buhis gikan sa katawhan pinaagi sa mga ‘direct and indirect taxes,’ arang-arang na lamang unta. Apan kun kawkawon lamang kini sa mga maldito ug bungoton sulod sa pamunuan ug among-amongan ang atong kaban kun panudlanan, pagka-makaluluoy na lang intawon sa tawo sa kamot sa mga gahamang nagapasulabi sa interes ug kaayuhan sa masa.
Unta mahidangat ang panahon diin ‘100% tax-free’ na kining atong katilingban. Pagkamaanindot tingali niana nga higayon diin ang atong kinitaan hingpit na natong maseparar ug matagana alang sa mga nag-unang panginahanglanon sa atong mga pobreng banay nga dili makigbahin ang estado sa dugo ug singot sa tawo!
Unta kun aduna kitay gobyernong mobarug ba nga pakubsan kun pamub-an ang presyo sa tanang mga nang-unang palaliton, hayahay unta ang kabus ug timawa sanglit ang atong matigom magamit na man unya nato alang sa pagpatungha sa atong mga kabataan, pamiste sa miyembro sa pamilya, tambal panahon sa pagpa-ospital, pagpundar ug yanong gambalay sarang kapahulayan sa mga trabahante gikan sa ilang mga impresa ug depensa sa kainit sa adlaw ug katugnaw sa kagabhi-on ingon man pagpanalipod sa atong pamilya gikan sa hadla sa kinaiyahan.
Mga damgo lamang kini nga pangaliya sa mas hamugaway nga klase sa pamuyo ambot lamang kon mahimo ba kini nga realidad sa atong panahon!
RadyoMaN June Duterte
