Davao City – Ang atong sosyedad kanunay gayud nga sugaton ug sungogon sa nagkadaiyang mga pagsulay sa atong kalig-on ug kapabilidad nga molahutay taliwala sa malisud nga mga hagit ug sitwasyon.
Gustohon man nato’g sa dili, dili tanan maayo ang atong ma-eksperyensyahan: Aduna gayud usay mga grabeng kapit-os sama sa mga higayon diin mosaka ug mosutoy ang presyo sa nag-unang mga palaliton sa merkaduhan.
Ug sa dihang mosaka na kini abtik-pinakurat, wala na gayud kitay mahimo pa gawas sa pagsustiner sa atong tagsa-tagsa ka mga kaugalingong ekonomiya, sa atong mga komunidad ug sa nasud in general haron molahutay kita nga walay tatsa ug walay pagkatandog.
Sa dihang mo-increase na unya ang presyo sa petroleum products, laomi nga mahitabo ang ‘chain reaction’ kun ‘domino effect’ sa merkaduhan, sa pletehan, sa kuyente, sa tubig ug uban pa natong daily needs.
Asa man kita paingon niini?
Depende. Kun wala ‘tay buhatong aksyon ug maghulat na lamang kita sa kun unsay anaa ugma, klaro kaayo nga maabtan gayud kita sa kanas-kanas. Alang nako, maningkamot ‘ta sa atong personal nga inisyatiba. Dili nato isangun tanan ang responsibilidad pag-improbar sa atong mga kinabuhi diha sa gobyerno o estado.
Oo, daku’g papel nga gihuptan ang gobyerno pag-instalar sa usaka sitwasyon nga ‘conducive to productive living’ pinaagi sa paghikutar sa mga balaud pabor sa mga gagmay’ng tawo. Apan kun gobyerno lamay atong saligan pananglit sa pag-demand nga patas-an ang inadlaw-adlaw’ng suholan basi unya ug ma-discourage lamang kita.
Kun adunay increase, mas labing maayo. Apan kun wala ug mahikawan kita nianang panan-awon, balik ‘ta sa kinaugalingon. Limitahan nato ang atong daily nga paggasto, praktison nato ang pagdinaginot mientras hubas pa ang atong panudlanan, unahon ang atong mga ‘needs’ inay nga i-prioritize ang atong mga ‘wants,’ labaw sa nga tanan maningkamot makadiskarte nga ma-komponer ang atong finances ilabi na ang atong mga galastohonon ug mga bayronon.
Nianang pamaagiha, molihuk kita sa atong presenteng kapasidad apan kon mo-asistir unya kanato ang estado, nan magpasalamat ‘ta sa maong senaryo.
RadyoMaN June Duterte
