Davao City- Atong suportahan kining sugyot-balaudnon ni City Councilor Joselle Dilig-Villafuerte aron hikutaron ang kahimtang niadtong atong mga kaigsoonang naliso-an sa maayong pangisip ug kadtong adunay tendency nga mohimo sa dili maayo sa iyang kaugalingon ug ngadto sa katilingban.
Suportahan nato ang panawagan nga magmontar ug klarong programa alang sa rehabilitasyon ingon man medikasyon sa mga tawong napagngan na sa ilang paglaum gumikan sa daghang mga suliran, pagsulay ug mga hagit sa kinabuhi.
Dinhi angayang mo-entra una ang tibuok pamilya sanglit ang ato man gyung ‘first line of defense’ sa matag adlaw mao man ang atong mga mahal sa kinabuhi.
Angayan usab nga mangamot na direktamente ang estado lokal man o nasyunal ubos sa mandato kun prinsipyong ‘parens patriae’ diin ang gobyerno mao gayud ang magsilbi nga ginikanan sa mga walay katakos panalipdan ang ilang kaugalingon gikan sa hadla sa matag adlaw’ng tanan.
Ubanan nato kini sa aktibong partisipasyon sa tanang sektor sa komunidad sama sa pribadong sektor, kasimbahanan kun religious community, academe kun ang mga tunghaan, kolehiyo ug mga unibersidad ug uban pa.
Dili nato pasagdan nga madayonan ang kabuang sa atong mga kababayan gumikan kay wala kitay matampong bisan yanong panabang lamang or bin ba kaha gumikan sa batasan nga walay pagpakabana sa kaayuhan sa atong mga kaigsoonan.
RadyoMan June Duterte
