Davao City- Maanindot tuod ang laraw sa gobyerno nga pag-modernisa sa atong public transport system ilabi na sa pinaka komon gayud nga mode of public transport: Ang Public Utility Jeepneys kun PUJs.
Apan anaa usab ang kaakibat nga disbentaha sanglit ubay-ubay ang nabalaka nga sila makulban sa ilang kaldero sanglit pamasahero man lamay ilang nahibal-ang matang sa panginabuhi.
Sa matag adlaw nga dili unya sila makabyahe bunga sa rehabilitation kun pag-improbar sa tagsa-tagsa nila ka mga gi-drayban nga sakyanan, kana nagpasabot usab nga dugang suliran sa ilang panggastos kun pamugas ug panud-an, pamasahe, pang-baon ug pangmatrikula sa ilang mga batan-ong estudyante ug uban pang mga implikasyon.
Mao kana ang scenario apan alang nako, panahon na karon aron atong i-modernisa ang klase sa atong pampublikong panakayan sa nasud-Pilipinas ug haron makadungan kita sa lakat sa progreso ug martsa sa kaugmaran sa atong silingang kanasuran kansang trademark mao na ang hilway nga matang sa public transport.
Ato nang ihikutar ang mas paspas, dili dayon mokagar, mas hinlo ug mas luwas nga matang sa panakayan tungod ug alang sa kumbinyenteng paglawig kun paglakat sa atong mga sumasakay kun mga commuters.
Angay masabtan sa tanang mga maapektuhang drivers ug operators sa mga PUJ units nga aduna gayuy ma-eksperyensyahan nga kahasol apan parte kana sa modernisasyon.
Kun magpondo kita sa presenteng sitwasyon, moabot ang panahon nga ang kakaraan sa mga yunit-pamasada mao ra unya usab ang maghatud kanato sa perdisyon gumikan sa disgrasya sa dalan or bin ba kaha sa polusyon nga makadaut sa atong panglawas.
RadyoMan June Duterte
