Davao City – Matuod gayud nga usaka maayong balita ang anunsyo sa National Police Commission kun NAPOLCOM nga sa dili madugay, relaxed kun gipadaplin na ang karaang rekwisito nga minimum height requirement alang niadtong mga aplikanteng nangandoy mamahimong police officers and personnel.
Kini maoy mag-abli unya sa dakung kahigayunan sa mga Pilipinong buot mangalagad diha sa atong national police force haron makatampo sa ilang kahibalo ug serbisyo alang sa nasud nga gihadla ug nag-atubang karon sa dili basta-bastang mga hagit ug pagsulay sama sa natad sa kahusay ug kalinaw ug sa atong kinatibuk-ang seguridad.
Pagpamatuod lamang kini sa komon nga obserbasyon nga panahon na haron ang atong nasud hatagan sa igong pagtagad dili ang pisikal nga mga reglamentos apan diha sa mas kritikal nga mga konsiderasyon sama sa katakos, kaisog, kaligdong, pamatasan o kostumbre ingon man dedikasyon sa pagpangalagad sa tawo sa usaka aspiring police.
Usa usab kini sa pruweba nga karon bukas na ang pamunuan sa pagkonsidera sa pagpahalapad sa oportunidades sa pagpanerbisyo haron mawagtang na ang karaang diskriminasyon ug haron ang tanan makatampo sa ilang kaugalingong kapasidad alang sa pagpatunhay sa atong sosyedad.
Maanindot kini nga senyales nga dili imposible ang higayon diin ang tanan mamahimo nang mo-ambit sa tanang tsansa sa pagpanerbisyo regardless of age, social standing, physical attributes ug uban pang mga external requisites.
Nindot kini nga indikasyon nga karon ang angay tutukan mao ang mental, psychological ug spiritual status sa usaka police applicant ilabi na nga dili komedya ang iyang pagasudlan nga nataran: Kana mao ang pagpanalipod sa mga yanong katawhan ilawom sa bansilag nga ‘To Serve and to Protect.’
RadyoMaN June Duterte
