Davao City- Layo pa gani kaayo ang sunod nga national election apan daw nakita na nako ang pagkabanhaw sa pamulitika karon ilabi na niining init kaayong mga isyu sa gobyerno kontra sa mga kritiko ug detractors niini.
Oo, balido ug lehitimo ang mga isyung ninggula: Korapsyon sa Bureau of Customs, nasakote nga dili basta-bastang kantidad sa shabu gikan sa nasud sa China balor P6.4B, Davao Group, cement smuggling, ‘tara’ or payola system ug uban pa.
Kun ako ang inyong pasulti-on, dapat lang nga mahibaw-an natong tanan unsa ba gayud ang real or kamatuoran diha sa mga alegasyon ug kontra-alegasyon.
Dili nako matingala kang Sen. Antonio Trillanes: At least nibarug siya sa iyang pagka-oposisyonista dili pareho anang uban nga mura’g langaw pula’g lubot, kun asa gani ‘tong bag-ong bulak nga nangalimyon, didto na pud maniba-siba…pagka na lang gyud ka oportunista ning uban.
Apan kwidaw ‘ta diha, mga ‘bay: Letihimo tuod ang mga gipresentar nga mga punto-hisgotanan apan klaro pa’s pahak ni Manoy nga kining tanan tipik ug kabahin gayud sa sayo nga istratehiya sa mga kalaban sa administrasyon nga guba-on ang presenteng liderato – haron sila na pud ang makalingkod sunod.
Kun ako si Vice-Mayor Pulong or kun ako si Atty. Mans Carpio, I would welcome the opportunity to clear my name in the halls of the Senate. Dili nako tugtan nga magmaya kun maghudyaka ang mga kalaban sa paglikay sa imbestigasyon ilabi na dunay panultihon ‘flight is an admission of guilt.’
Motambong ko sa kun asang dapita ko gi-akusahan aron didto hinloan ang akong pangalan – ilabi na kun wa koy nahimong sala or dautan.
Sa atong mga kaigsoonang Muslim, assalam alaikum ug Eid Mubarak!
Kasamang June Duterte
