General Santos City—gitulis sa wala pa mailhing suspetsado ang usa ka pump boy sa usa ka gasolinahan sa may Barangay Poblacion, Polomolok, South Cotabato.
Ang biktima giilang si Ian Mier, 23, residenti sa Barangay Poblacion, Polomolok. Alas 2:15 ang takna sa kabuntagon samtang ang biktima anaa sa gasolinahan nga gitrabahuan niini partikular na ang Orient Gasoline station nga nahimutang sa Depalan Street, kalit miabot ang duha ka mga suspek nga sakay sa motorsiklo.
Gitiunan ug pusil sa mga suspek ang biktima dungan sa pagdeklara ug hold-up. Utngod sa tumang kahadlok, buluntaryo nalang nga gihatag sa biktima ang iyang mahalong cellphone. Paspas usab nga misibat ang mga suspek padulong sa sentrong bahin sa lungsod.
Gilayon usab nga midangop sa Polomolok Municipal Police Station ang biktima aron isumbong ang insidenti, naghimo pa ug hot pursuit operation ang kapulisan apan wala na gyud maabti pa ang mga suspek.
