Davao City – SAKTONG LAKANG alang kanako ang pagpahawa ug pagpabalhin niadtong mga residente nga anaa nagpuyo sa mga delikadong lugar o gitawag nga mga danger zones.
Gani dili na angayang kwestiyonon pa kung angay ba o dili nga pahawaon ang mga pamilyang nagpuyo sa delikadong mga lugar gumikan kay nasayod man gyud kita nga peligroso kining mga dapita. Mao bitaw nga gitawag kining danger zones.
Apan dili usab nato mabasol ang mga apektadong residente kung bation sila og kabalaka sa dihang sila i-relocate tungod kay labing maapektuhan ang ilang panginabuhian. Apan bisan pa, nagtuo ko nga wala na’y mas bug-at pa nga rason sa pagbalhin nila ngadto sa luwas nga lugar kundili ang pagseguro sa safety sa kinabuhi sa matag miyembro sa pamilya. Wala na’y mas bilihon pa kaysa kinabuhi. Dili ang panginabuhian, nungka ang mga propriedad o kabtangan ang himuong rason nga mosupak ang uban sa pag-demolish sa ilang mga delikadong gipuy-an.
Kanus-a pa man diay kita manglihok? Diha na ba sa panahon nga anaa na sa atong tugkaran ang tubig-baha? O ayha pa ba kita mo-aksyon kung taga-hawak o bin ba kaha taga-liog na ang tubig nga misulod sa mga panimalay? Hinaot pa unta nga di na nato paabuton pa nga dunay mga kinabuhing makalas una pa nato ma-realisar nga dili luwas ang lugar nga gibarugan sa atong mga pinuy-anan. Gikan sa ‘danger zones,’ dapat na gyud kita’ng mobalhin sa ‘safe zones.’
Sakto gayud ang giingon sa uban nga kitang mga Pinoy, mutuo lamang kung duna na kita’y dili tiaw nga kasinatian. Wala pa ba kita makaamgo ug makaangkon og leksyon sa daghang mga mapait nga kasinatan nato isip usaka nasud kung hisgutan ang mga kalamidad? Nakalimot na ba kita sa daghang mga nangamatay natong kaigsuonan gumikan sa kakulang sa atong pagpangandam?
Angay natong hinumduman nga ang mga baha, landslides ug uban panag katalagman wala ug dili maundang sa 2017. Sa pagsulod sa bag-ong tuig, akong panghinaot nga bitbit na nato ang kinaiya nga mas preparado ug mas andam sa pag-responde sa mga katalagman nga atong masugata sa musunod nga mga katuigan.
RadyoMaN Misel Miral
