Davao City – Alang sa usa ka lider kun namunuan, mahinungdanon kaayo nga siya nasayud sa hingpit nga gibati kun gimbut-an sa iyang gi-alagaran nga katawhan. Kun siya man gud konektado sa kasingkasing sa tawo, siya dili gayud mahimulag sa kun unsay buot sa kadaghanan nga mahitabo.
Guided unya ang usaka presidente o pamuno-nasud o magbabalaud sa angay nga palisiya, programa o prayoridad nga angay hatagan sa unang pagtagad ug unsa ang gihandum nga progreso sa publiko.
Importante ang surveys silbing barometro kun gantangan sa public opinion, perceptions or impressions.
Kun gamiton kini sa hustong pamaagi ug katuyuan, kini maoy maghatag ug kredibleng kasayuran sa naggunit sa pwesto sa matuod nga sitwasyon ug gipangandoy nga aksyon sa mga yanong lungsuranon.
Kun ang tawo mo-ingon nga okay sila sa ‘war on drugs’ apan buot nila nga dakpon nga buhi ang mga drug personalities, angay kining tahuron sa mga kadagkuan sa gobyerno. Kun ila kining ibale-nada, moabot ang panahon nga hinay-hinay na nga modakin-as unya ang approval ug trust ratings sa nasud ngadto sa ilang mga elected leaders.
Sa dihang mopadayag ang electorate sa ilang dakung kahingawa sa dugang buluhisan ug nagkarabanit gihapon nga presyo sa palaliton sa merkaduhan, angay kining dawaton sa mga anaa sa pwesto sanglit ang pagpihig sa maong kabalaka sa katawhan malagmit mosangpot sa paghukas sa tawo sa ilang suporta ngadto sa ilang lider sa sunod nga eleksyon.
Sukdanan lamang ang survey apan kritikal kaayo kini nga instrumento kun hinagiban haron ang usaka lider dili mahisalaag sa bul-og sa opinyon sa mayoriyang katawhan.
Sa dihang mapakyas ang elected official sa pagsanong sa kun unsay buot sa nasud, mawad-an unya siya sa gitawag nga ‘high moral ground’ sa paggunit sa renda sa pangagamhanan. Kun padayon siyang mapakyas sa paghikutar sa katuyuan sa iyang mga gi-alagaran, mas maayo pang mokanaug na lamang siya sa pwesto haron tugtan kadtong adunay katakos ug determinasyon nga pangulohan ang naghigwa-os gihapon nga katilingban!
RadyoMaN June Duterte
