Davao City – Nasabtan nako ang kabalaka sa mga nahadlok sa konseptong revolutionary government: Walay gayud kitay kaseguruhan tuod nga kun kini ipatuman ubos sa liderato ni Pres. Rodrigo Duterte, nga walay pagpang-abusar ngadto sa katungod sa katawhan.
Apan kun ato gayung sabton ug maayo nganong natawo ang maong opsyon, atong mahinumdoman ug maalinggatan nga dili kini yano nga kasulbaran sa mga dagkung suliran sa atong katilingban.
Angay sabton sa tanan nga kun man ugaling niabot sa punto nga konsiderahon ni Duterte ang revgov idea, kana gumikan kay dili lalim ang mga problemang gisugata karon sa atong nasud.
Sindikato sa droga, mga awtoridad, kapulisan ug mga heneral lakip ang mga elected barangay officials ug dagkung pulitiko nigula karon nga involved kun nagdula usab diay sa droga, naa pa ang rebelyon sa mga ISIS-inspired terrorist groups, mga rebolusyonaryong Moro ug mga Maoist communists, naa pa ang political opposition kinsa gikatahong nakigkomboya sa mga Duterte critics sa usaka grand conspiracy aron i-destabilisar ang iyang pamunuan: Kun ikaw si Duterte, dili ka kaha maghunahuna ug revgov aron depensahan ang katawhan gikan sa mga buot manabotahe sa atong panggobyerno ug katilingban?
Dili ‘ta mabalaka sa konseptong revolutionary government, nasulayan na nato kini kaniadto, ang ato lamang bantayan mao nga kun man ugaling ikapanaug siya, temporaryo lamang siya nga setup ug nga angayan ihikutar gilayon ang proseso ug mekanismo aron sa pagpatunhay sa normalisasyon sa estado.
Human unya nga ma-establisar ang bag-ong Konstitusyon nga naka-angkla gayud sa interes sa tawo, angay andamon ang pagpahigayon sa eleksyon aron mamili na kita ug bag-ong mga opisyales ug magsugod kita sa sinugdanan sa atong gitinguha ug gidamgo nga matuod gayud nga kausaban.
RadyoMaN June Duterte
