Davao City – Adunay mga higayon diin kitang pribadong mga lungsuranon tawgon sa panahon aron mohimo sa sakripisyo sama sa pagpadaplin sa pipila nato ka mga individual rights pabor sa hiniusang kaayuhan kun kahapsay sa atong katilingban.
Usa dinhi mao kining SIM Card Registration Bill: Sakripisyo kini sanglit kitang mga private citizens mandoan na man unya sa pagtunol sa atong mga personal data and information matag higayon nga mopalit kita ug SIM Cards.
Anaa ang kabalaka nga what if ma-hack kini sa mga computer operators haron lili-on ang uban pa natong mga accounts? Dili kaha kini mosangko sa kamot sa mga dautan aron gamiton diha sa commission sa gitawag nga mga cyber crimes?
Dili kaha mahitabo ning tungora ang nahitabo usab sa mga data natong mga botante sa dihang na-hack sa mga bongoton nga IT operators ang website sa COMELEC ubos sa iskandalong naila karon nga ‘ComeLeaks’?
Dili kaha mahitabo denhe sa ato kadto bitaw’ng gitawag nga Cambridge Analytica voters scandal sa America ingon man ang kadtong mas nahaunang iskandalo ug binuang nga giilang WikiLeaks sa Australyanong si Julian Assange?
Wala koy suspetso kun pagduda sa maayong katuyuan sa atong gobyerno sa SIM Card Registration measure, nabalaka lang ko sa posibleng pag-intervenir unya sa mga dautang tawo diha sa importanteng datos nga itugyan nato ngadto sa card sellers.
Hagit kini sa atong estado nga kumbinsihon ang tawo nga walay angayang kabalak-an ning maong sugyot-balaudnon sa Duterte administration.
RadyoMaN June Duterte
