Davao City – Atong hagiton ang matag usa nga paningkamotang makab-ot gayud ang luwas nga matang sa panakayan ug hilway nga kadalanan sanglit kinabuhi man natong tanan ang anaa sa makuyaw nga kahimtang.
Gumikan kay daku ang panahon nga atong gigahin matag adlaw diha sa pagbyahe, responsibilidad nato nga mamahimong driver o commuter nga may kaligdong ug pagtahud sa seguridad ug kalingkawasan sa katilingban.
Sugdan nato diha sa paghinumdom nga ang manibela o prangkisa talagsaong kahigayonan aron mangalagad sa katawhan laktod pagkasulti, dili kini lisensya haron magpaturagas sa paglawig kay nagdala kita ug kinabuhi sa atong mga sumasakay.
Ikaduha, sundon nato ang tanang mga lagda sa panakayan haron luwas kitang mahidangat sa atong paingnan: Tumanon nato ang regulasyon nga pagtenir ug roadworthy units, speed limit law, ang crash helmet law, ang road-sharing principle, ang pagtamod sa road courtesy ug dili magpadala sa init sa ulo kay kun initon ta’g pamensar o pangisip, makakita gyud ta’g away kanunay.
Ikatulo, kun kita pedestrians, sundon usab nato ang husto: Didto ‘ta motabok sa adunay crosswalk kun pedestrian lane o bin ba kaha pedestrian overpass, sunod ‘ta sa traffic lights, didto ‘ta mosakay ug mokanaug sa yellow lane or yellow box aron dili ‘ta masindulan sa driver nga otro sang way batasan!
Ug katapusan, kun kita law enforcer or implementor, hugot natong i-imposar ang kinatibuk-ang latid sa balaud, walang labis, walang kulang, patas nga pagtratar ug walay hatagan ug pabor como nagdala ug SUV or government plates ang nakatakin nga plaka.
The bottomline is mutual respect and discipline, both on the side of motorists and commuters including our government operatives on the road. Happy motoring kanatong tanan!
RadyoMaN June Duterte
