Davao City – Sa mga panahon diin hulga-on ug maayo ang atong seguridad, gikinahanglan saligan nato ang namunuan nga buhaton niini ang tanan haron mapanalipdan kita gikan sa disgrasya ug kaala-otan.
Usa sa hinagiban nga magamit sa mga lider sa nasud mao kining gitawag nga ‘calling out power’ sa presidente isip Commander-in-Chief nga manawag ug magpakitabang sa nasudnong kapulisan ug kasundaluhan aron protektahan ang atong Republika gikan sa kamot sa mga rebelde, insurektos, terorista ug uban pang pundok nga buot mogun-ob sa atong kalinaw.
Ang martial law implementation alang sa Mindanao kutob sa tuig 2018 nanukad sa reasonable kaayong basihan: Hangtud karon padayon ang recruitment online sa grupong ISIS, ania pa sa atong taliwala ang BIFF, Dawlah Islamiyah, Abu Sayyaf, Ansar al-Khalifa ug uban pang armadong grupo kinsa nag-arma aron pukanon ang estado.
Gawas niana, ang gobyerno nakigtigi usab karon sa uban pang mga prente sama sa ‘war on drugs’ diin nigula gani ang sugilanon nga diay ang terorista nagkomboya na sa mga dagkung mamsa sa droga ug gipakayab ang bandila sa ‘narco terrorism.’
Dili ba kini pupaigong rason aron atong armahan usab ang estado sa gubat kontra dautan haron dili mapulihan ang atong panggobyerno sa idelolohiyang langyaw diin nagtakuban sa pagpanudlo nga layo ra sa atong nabatasan or bin ba kaha nagpahipi lamang ilawom kunohay sa landong sa relihiyon aron danihon ang mga batan-on nga mo-alsa sa ngalan ni Allah?
Sama na sa akong ginaingon sa makadaghang higayon dinhi sa atong tulumanon, saligan nato ang liderato ni Pres. Rodrigo Duterte. Siya ang tinudlo sa tawo, angayan lamang nga hatagan sa higayon sa pagpatuman sa iyang mandato. Walay luna sa atong katilingban ang nagapunay sa pagpangita’g maut, daut ug buslot apan sila mismo wala man gani’y gikatampo bisan gamay alang sa atong hiniusang kaluwasan ug progreso.
RadyoMaN June Duterte
