Davao City – Matuod gayud nga makaingon kita nga mas lisud karong panahona magpadaku ug mga anak ilabi na diha sa ilang pagpa-eskwela.
Kini gumikan kay ania na kita ubos sa gitawag nga K-12 Educational System diin mas gipalapdan nato ang tuig ting-tungha haron mas mabansay pa gayud ug maayo ang atong mga tinun-an susama sa ubang nagmalamboong kanasuran sa Asya ug sa entero kalibutan.
Dakung hagit kini ngadto sa daan nang nagkalisud nga kahimtang ekonomikanhon sa atong mga nagkagidlay nang daang mga pobreng ginikanan.
Apan tipik ug kabahin kini sa modernismo, nga diin kun gipangandoy nato ang pagpahitsas sa atong mga estudyante nga mamahimo silang makonsidera nga ‘world class,’ nan angayan nato kining sagopon nga matang sa kabag-ohan or kausaban sa kalihukan sa akademya.
Ang ako lang gipangaliya mao nga unta magbukas kini’g bag-ong mga ganghaan kun oportunidades sa pagpangempleyo niadtong mga K-12 Senior High School graduates kinsa buot na nga makatabang sa ilang tagsa-tagsa ka mga pamilya pinaagi sa usaka masaligang matang sa trabaho.
Ako lamang usab gipangandoy nga hugot na nga mapa-implementar sa atong mga State Universities & Colleges kun mga SUCs ang gibandilyo sa gobyerno nga free college or tertiary education haron mas daghang batan-ong Pilipino dili mawad-a’g paglaum nga makagradwar sa kolehiyo.
Ablihan nato ang employment opportunities alang sa mga Tech-Voc graduates sa Senior High kun Grade 12 apan dili nato ibale-wala or ibale-nada ang atong pangandoy nga ang matag batang Pinoy makabaton gayud ug hingpit nga four-year college degree or course pinaagi sa libre nga pagtungha gamit ang rekursos sa estado.
Education is everyone’s basic right. It should not be denied the Filipino child. Ang atong mga anak nanginahanglan sa tanang panabang gikan sa gobyerno haron makabarug sila nga may igong katakos kontra sa karaang sulirang naghigot kanato sa kapildihan: Kana mao ang kakulang sa hustong edukasyon nga mosangpot unya sa kawalay empleyo ug kawalay paglaum sa kaugmaon sa tawo.
RadyoMaN June Duterte
