Davao City – Mga kasama, unsay leksyon nga angay natong makat-onan sa mapait kaayo natong kasinatian sa pagkaugdaw sa NCCC Mall una pa ang adlaw sa Pasko?
Una, angay natong masabtan unsa gayud ang kawsa sa sunog aron kaantigo ‘tang mopahigayon sa hustong aksyon. Buot natong mahibaw-an unsa ang kakulangon sa mall management in terms of fire safety standards sama sa presensya sa emergency fire alarm system, fire exists, water sprinklers ug uban pang pangdepensa sa mga okupante sa maong balay-pamatigayon.
Kun ma-establisar na unya ang tanang sirkumstansiya sa naasoyng trahedya, nan diha na mamahimong sugdan ang seryosong pagtoon sa tulubangon sa kumpaniya kalakip na dinha ang posibleng mga kasong kriminal gumikan sa pagpabaya kun ‘homicide by negligence’ ug ‘violation of safety standards in the workplace’ ug uban pa.
Ikaduha, angay natong reviewhon ang kapabilidad sa atong mga firefighters itandi sa world-class standards sa uban pang mga emergency responders sa uban pang parte sa kalibutan.
Kun tinood man nga adunay kakulangon ang atong mga bumbero diha sa kahibalo o skills or bin ba kaha sa mga equipment ug uban pang mga kahimanan, ato kanang dawaton nga masakit nga realidad.
Gikan dinha, dili ‘ta moundang pinaagi lamang sa pagpangita ug buslot ug pagbinasulay kay wala kanay kaayuhan ihatag ngari kanato. Hinonoa, tabangan nato ang atong fire bureaus nga palig-onon pa’g mas maayo ang ilang katakos nga moharong sa nagdilaab nga kalayo.
Ug ikatulo, lantawon nato ang Davao Mall Tragedy nga usaka ‘eye-opener’ ug ‘wake-up call’ nga ato nang sutaon ang fire safety sa uban pang mga malls ug commercial establishments sa atong komunidad, lakip ang mga boarding houses kon dili ba kini sila mga ‘highly-combustible structures’ kun gitawag nga ‘sunogable.’
Sa mga taga-gobyerno, please seryosohon na nato ang pag-check up sa mga balay-pamatigayon sa ilang mga fire safety requirements. Dili na ‘ta mosugot nga bayran ‘ta or subornohan ‘ta aron mahalikay ang tawo gikan sa ciertong kamatayon sa dihang mobusikad sa atong nahimutangan ang mga ‘towering infernos.’
RadyoMaN June Duterte
