Davao City- Mientras nagmaya ug gikalipay og dako sa katawhang Pilipino ang malampusong pagkasiknit sa kasundalohan sa mga dagkung lideres sa ISIS-Maute Terror Group nga sila Ismilon Hapilon ug Omar Maute, maayong batasanon nato sa gihapon ang pagkamabinantayon sa atong palibot.
Ang katapusan sa halos lima kabulan nga kagubot sa Marawi City wa magpasabot nga maundang na usab ang mga dautang plano sa mga grupo nga walay laing tumong kundili ang pagpanghasi bitbit ang ilang ideolohiyang panenorismo.
Di kita magkumpiyansa, inay mas angay natong pahugtan pa ang pagbantay sa atong seguridad. Di na nato buot pang masubli ang nahitabo sa siyudad sa Marawi. Atong nakita ang hilabihan kadako nga kadaot nga bunga sa paghawid sa mga terorista sa daghang mga kinabuhi sa maong lugar. Makaingon man kita karon nga pipila ka tikang na lamang og matapos na gyud ang gyera, apan taas pa kaayong panahon ang igahin alang sa rehabilitasyon.
Uban sa pagkabungkag sa mga panimalay, tulonghaan ug istruktura didto sa Marawi mao ang pagkahugno usab sa mga pangandoy sa mga naapektuhan sa maong lugar. Daghang kinabuhing nakalas, mga anak nga nawad-an og ginikanan ug ginikanan nga nawad-an og mga anak, mga samaron ug gani napatay nga mga sundalo ug miyembro usab sa kalabang grupo – way nangandoy niining tanan gawas sa pipila ka mga panghunahuna nga buot lamang iduso ang ilang dautang agenda pinaagi sa bayolenteng pamaagi.
Ang pagtapos sa kaguliyang sa Marawi maghatag kanato og bag-ong panglantaw ug pagsugod. This time, ang mas gipahugtan, mas gipalapad ug mas gipangandamang aksyon aron mapugngan, kung dili man gayud hingpit nga maundang ang terorismo. Ang atong mga otoridad, kasundalohan ug kapulisan, inabagan sa dakong suporta, kooperasyon, kumpyansa ug kaisog sa katawhan maoy atong lig-on nga pansagang batok sa mga terorista.
RadyoMan Misel Miral
