Davao City – It is not for us to judge what compels anyone to commit suicide and take his or her own life. Wala kita masayud unsay posiblementeng mga sirkumstansyang magtukmod sa usaka nilalang nga magtubok kun maghunos sa iyang kinabuhi.
Apan aduna kitay dakung responsibilidad nga mohimo sa kaya natong himoon aron makatabang diha sa pagsabot ug pagpangita’g solusyon or opsyon aron ang susama niini nga matang sa binuhatan unta atong mapugngan.
Pananglitan ang hisgotanang depression ug kun nganong ang usaka tawo makasinate man ning maong kahimtang nga malagmit mohatud kaniya ngadto sa dinautan – kini angayan gayud nga atong tutukan.
Dawaton nato nga ang suliran usa gayud ka dakung factor kun kawsa kun nganong ang usaka tawo mahutdan sa kusog, saktong pangisip o pamensar, hustong reaksyon ug tarong ug balansyadong panglantaw sa kinabuhi ug sa kalibutan – walay maayong laki niana nga dilemma situations.
Kun mosangko na sa ing-aning sitwasyon ang usaka lungsuranon ilabi na kun walay mo-agakay kaniya sa ensaktong panghunaha, mawad-an ug mahutdan gayud unya siya sa igong determinasyon o animo nga mobarug nga lig-on sa mga hagit kaniya sa kapalaran.
Ug kun mahidangat na gani sa susamang sitwasyon, ang tawo mahikawan na gayud unya sa paglaum o pag-asa nga makalingkawas pa sa iyang nalubngan nga masalimuot nga kondisyon.
Para nako, kargo ug obligasyon sa sosyedad – natong tanan, sulod ug gawas sa gobyerno kun estado – nga magbaton sa abli nga daunggan ug kasingkasing andam mopahupay sa gibating kasakit ug kaguol sa atong isig-kaingon nga nagbangutan sa taman tungod sa problema.
Ang pisi, armas de fuego o bin ba kaha ang pag-ambak gikan sa tulay o sa taas nga bahin sa mall o edipisyo mamahimo gayud nga ‘convenient escape’ niadtong gibati nga sila nag-inusara na lamang.
Dili ‘ta manghusga: Dili nato na responsibilidad. Ang tahas kanato mao nga gamit ang hiyas ug kun unsa may gitugyan sa Kahitas-an kanato karon, ato kining gamiton diha sa pagtabang sa nagkalisud nga igsoon, ang paghatag og panahon, pasidaan, tambag ug asistinsya haron ang naghambin ug tumang kaguol aduna pay madaganan, maduolan ug masandigan panahon sa kalisud.
RadyoMaN June Duterte
