Sumbanan sa pag-apod-apod sa binhi ug abono, giklaro sa Provincial Agriculture’s Office

Giklaro sa Provincial Agriculture Office sa probinsya sa Bukidnon ang sumbanan sa ikaduhang hugna sa pag-apod-apod sa binhi ug abono.

Sa interview sa RMN Malaybalay ngadto kang Provincial Agriculturist Alson Quimba, gibutyag niini nga ang mga kwalipikado ninii nga hinabang kadto lamang adunay usa ka ekarya paubos nga uma ug wala nay lain pang tinubdan sa panginabuhian. Dili malakip niini nga hinabang kadtong adunay kapin usa ka ektarya nga uma ug kadtong adunay usa ka ektarya paubos apan adunay laing inubdan sa panginabuhian o sideline, sama sa tindahan o habal-habal.

Dili usab mamahimong mudawat pag-usab ang nakadawat na niadtong bulan sa Marso ning tuiga sa 1st batch distribution.


Matud ni Quimba nga ang usa ka mag-uuma nga apil sa listahan sa mga matagaan makadawat ug duha ka sakong abono ug 9 ka kilos nga binhi sa mais.

Nasayran nga target sa buhatan nga matagaan ang muabot sa 21,818 ka mga mag-uuma ang makadawat sa mao nga tabang. Mukabat matud pa sa 43,636 ka sako sa abono ug 21,818 ka sako sa binhi nga adunay tag 9 ka kilos kada usa sa kinatibuk-ang kantidad nga sobra sa 188 milyones ka pesos.

Kung i-convert matud pa kini sa kwarta, ang kada mag-uuma makadawat ug tag P5,410.

Base sa schedule alang karong semanaha:

Sa Hulyo 23, ang lungsod sa Damulog, Kadingilan ug Kibawe.
Sa Hulyo 24, ang lungsod sa Dangcagan, Don Carlos, ug Kitaotao.
Sa Hulyo 25, lungsod sa Kalilangan, Pangantucan ug Quezon.
Sa Hulyo 26, lungsod sa Libona ug Talakag; ug
Sa Hulyo 30 ang lungsod sa Baungon ug Malitbog.

Facebook Comments