PAGADAKPON sa kapulisan sa probinsya sa Bukidnon ang si kinsa man nga magpahigayon sa iligal nga sugal, sama sa tari-tari o tupada, subay sa mandatu nga gipagula sa National Inter-Agency Task Force diin hugot nga gidili ang pagtapok sa mga tawo ning panahon sa pandemya.
Sa report nga gipaabot ni PCol Roel L. Lami-ing, Provincial Director sa PNP-Bukidnon ngadto kang Provincial Governor Jose Ma. R. Zubiri, Jr., gipahibalo niini nga diha-diha nga gi-aksyonan sa operatiba sa Valencia City Police Station ug Quezon Municipal Police Station ang gipadangat nga reklamo sa Isumbong Mo Kang Governor Hotline gikan sa usa ka nagpakabana nga lomolopyo kabahin sa iligal nga tari-tari.
Hugot nga gipahimangno-an sa kapulisan ang mga residente nga likayan ang susamang iligal nga sugal, mga tapok nga dili gikinahanglan gumikan naka-alerto sila batok sa susamang mga kalihukan.
Dako usab ang pagpasalamat sa Opisina sa Gobernador sa nagpadangat sa maong reklamo ug subling nag-awhag sa tanan nga kung aduna man mabantayan nga dili maayong kalihukan, diretso kining i-report sa mga otoridad o ba kaha mo-text sa Isumbong Mo Kang Governor Hotline Number 0917-816-3191 o 0998-544-5693.
