Nakagapos kag wala na sang kabuhi sang masapwan ang isa ka lalaki sa higad sang karsada sa Circumferential road, Pakiad, Oton alas 6:30 kahapon sang aga , Disyembre 23.
Ginkilala ang biktima kay Jhon Roe Gregori , 23 anyos sang Brgy. Lanit, Jaro.
Base sa pagpangusisa sang Scene of the Crime Operatives ukon SOCO, nakaagum sang duha ka pilas sa agtang ang biktima nga ginapatihan igo sang pusil .
Naputos sang packing tape ang iya ulo samtang nabaklid kag gingapos ang duha ka kamot sang duct tape kag nagapos man sang nylon ang iya tiil.
Narecover sa lugar ang isa ka sapatos nga pula , duha ka cable tie , face mask kag panyo nga nakaputos sa baba kag liog sang biktima .
Base sa record sang PRO-6 , si Gregori ang identified bilang street level target kag tokhang surrenderee man sang nag ligad nga December 16, 2016.
Si Jhon Roe Gregori hinablos sang ginpatay nga sanday anay Bakhaw punong barangay Remia Gregori kag PDEA 6 identified druglord Richard Prevendido.
