iFM Laoag – Maisayangkat ti panagsanay dagiti agtutubo para iti Special Program for Employment of Students (SPES) para ti Summer Job 2019.
Mangrugi ti nasao a panagsanay intuno Abril dose (12), ala una agingga iti alas singko ti malem iti auditorium iti kapitolio probinsial.
Segun ken ni Mrs. Anne Marie Lizette Bitancor Atuan, manager ti Provincial Public Employment Service Office, gagem ti nasao nga aktibidad a maiyam-ammo kadagiti maseknan dagiti responsibilidad ken dagiti rumbeng nga aramidenda iti uneg ti nagduduma a pagopisinaan ti gobierno.
Inbunannagna a mangrugi dagitoy a mai-deploy intono Mayo dos (2) ken agtrabaho da iti uneg ti duapulo (20) nga aldaw.
Inlawlawagna a kas met laeng iti sigud a maidestino dagiti maseknan kadagiti bukud da nga ili wenno siudad tapno saan unay a magastosan dagitoy.
Impalgakna nga aggigiddan amin dagitoy nga agtrabaho ita a summer saan a kas kadagiti kallabes a tawen nga adda ti umuna ken maikadua a bansada gapu ta bassit ti budget a naaprobaran iti Department of Labor and Employment wenno DOLE para iti daytoy a programa.
Maipalagip a ti SPES ket pagbinbinnuligan a programa dagiti Local Government Units a kas iti gobierno probinsial ken ti DOLE.
Daytoy ket mandato pa iti Republic Act No. 7323 wenu “Linteg a mangtulong kadagiti nakurapay, ngem, nagaget ken nalaing nga estudyante.”
Bernard Ver, RMN News
