General Santos City–Posible matud pang electrical short circuit tungod sa pag series sa kuryente ang hinungdan sa nahitabong sunog sa Purok Islam, Barangay Dadiangas South, Gensan nga miresulta sa pagka-ugdaw sa ubay-ubay nga mga panimalay ug boarding house. kini ang nahimong pamahayag ni Fire Chief Inspector Reginal Legaste ang Fire Marshall sa Bureau Of Fire Protection-Gensan.
Sumala pa ni FCI Legaste nga sa pagsuta matud pa nila sa area nga nasunugan ilahang nakit-an nga daghan ang mga nag-series ug kuryente hinungdan nga dili layo nga mahitabo ang electrical short circuit ug tungod gama sa mga light materials ang mga panimalay, dali lang kini nga gilamoy sa kalayo.
Dugang pa sa opisyal nga panahon na matud pa nga mamahimong estrikto ang goberno sa pag bawal sa series connection sa linya sa kuryente aron usab nga malikayan ang susamang insidenti.
Samtang usa matud pa sa nahimong problema sa mga bombero nga mireponde sa maong sunog mao ang gamay nga dalan pasulod sa maong lugar kung asa nag sugod ang kalayo. Daghan matud pang nakaharang sa dalan mao nga nalisdan ang kabomberohan ug Fire Volunteers.
Miabot ngadto sa 2nd alarm ang nahimong assestment ni FCI Legaste sa nahitabong sunog kung asa nangayo na sila ug tabang sa mga kasigbit nga lugar sa pagpalong sa kalayo.
Samtang gibana-banaan nga muabot sa P500,000.00 ang nahimong damyos sa maong sunog ug mukabat ngadto sa kapin kon kulang 500 ka mga indibidwal ang na apektuhan sa maong insidente.(Dave Silagan)
