Davao City – Gipanghimakak sa usa ka sundalo nga siya ang mipusil sa managsuon sa calinan ning syudad alas 11 sa kagabhion nga gikamatay sa usa samtang ang usa samaran.
Sumala sa report sa Calinan PNP, giila ang suspek nga si Private First Class Melgar Sumopang alyas Michael ug nakadestino sa 3rd Infantry Battalion Philippine Army didto sa Malagos area ning syudad.
Matud sa suspek nga wala kuno siya nagpabuto sa iyang pusil ug igo lang siya nagkaon sa nasangpit nga lugar apan adunay mga testigong nakakita sa krimen ug giduot nga ang sundalo ang namusil.
Base sa unang report, napatay ang usa ka Eddie Otano Gumila, 28 anyos samtang angol si Gary Otano Gumila, 27 anyos ug pulos nagpuyo sa Purok 2 Manuel Guianga Tugbok District ning syudad human gipusil sa Roman Diaz St. Calinan District.
Dugang pa nga igo ra unta mopalit og pagkaon ang mga biktima diha sa may Calinan ug kalit lamag sila giduol sa usa ka lalaki kinsang gituohan karon nga mao ang nasangpit nga sundalo.
Balhug na sa prisuhan ang sundalo ug mag atubang og kasong murder ug frustrated murder samtang ipailawum usab ang gitudlong suspek sa paraffin test.
RadyoMaN Renz Barbarona
